Қарағанды ОӘҒК

КОРНЕЕВ ИВАН ИЛЬИЧ

(1914-1979)

Корнеев Иван Ильич 1914 жылы Бұхар жырау ауданының Петровка ауылында дүниеге келген. Соғысқа дейін Башқұрстанда тұрды. 1942 жылы қаңтарда Жамбыл облысының Шу ауданында майданға шақырылды. Гвардия сержанты. Соғыстағы ерлігі үшін 1943 жылы Қызыл Ту, Қызыл Жұлдыз 1 және II дәрежелі Отан соғысы ордендерімен, медалдармен марапатталған. 147-ші гвардиялық полктің гвардия сержанты И.И. Корнеевқа 1945 жылы Варшава-Берлин маңында болған ұрыстағы ерлігі үшін КСРО Жоғарғы Кеңесі Президиумының Жарлығы бойынша 1945 жылы 27 ақпанда Кеңес Одағының Батыры атағы берілді. Соғыстан кейін Куйбышев облысының Жигулевск қаласында тұрды.

КОЛОДИЙ ИВАН МИХАЙЛОВИЧ

(1912-1954)

Колодий Иван Михайлович 1912 жылы Қарағанды облысының Нұра ауданының Киевка ауылында туған. Армия қатарына Өзбекстаннан аттанды. Соғыста көрсеткен ерлігі үшін 1943 жылы «Жауынгерлік ерлігі үшін», «Ерлігі үшін» медальдарымен марапатталды.

1943 жылы 15 қазанда радиотелеграфист Колодий бастаған жаяу әскерлер жау оғы нөсеріне төтеп беріп, Днепрдің арғы қабағына өтті. Жағаға жақындап қалғанда Колодий жараланып, арқасындағы рациясымен суға құлады. Колодий өзінің ауыр жарақатына қарамастан, басқа да командирлерге дұрыс жол сілтеп отырды.

КОЛБАСОВ НИКОЛАЙ ИЛЛАРИОНОВИЧ

(1911-1943)

Колбасов Николай Илларионович 1911 жылы туған. Гвардия кіші лейтенанты. 199-шы гвардия артиллериясы полкінің 1-ші взводының командирі. Жауынгерлік алғашқы қадамы Сталинград шайқасында басталды. Курск - Орлов ұрысында өзінің ерекше ержүректігін көрсетті. «Сталинградты қорғау үшін», «Жауынгерлік ерлігі үшін» медальдарымен марапатталған. 1943 жылы 11-ші шілдеде Белгород қаласының маңында ерекше шайқас болды. Жаудың 150 танкі мен жаяу әскерлері, 228-ші гвардия атқыштар полкінің сол қанатына дүрсе қоя берді. 17 немістер танкілері Колбасов батареясына қарсы тіке шабуылға шықты. Колбасов осы ұрыста 4 танкті қиратты, жүзге жуық жаудың әскерлерін құртып, өз адамдарын қоршаған неміс танкілері мен автоматчиктерінен аман алып шықты.

КАМАЛДИНОВ ФАРАХ ГИМДЕЕВИЧ

(1914-1987)

Камалдинов Фарах Гимдеевич 1914 жылы Томск облысының Кривошеин ауданының Нұрқай ауылында туған. Мектепті бітіргеннен кейін тракторшы, моторшы болып істейді. 1934 жылы Кеңес армиясына шақырылды. Отан үшін 1934 жылы Хасан көлі шайқасына, 1939-1940 жылдары фин майданына қатысты. 1940 жылы Мәскеуде жаяу әскер училищесін бітіргеннен кейін, өз өмірін әскери жұмысқа арнады.

Жауынгерлік ерлігі үшін Орталық майдан құрамындағы 13-ші армия, 81 -ші атқыштар дивизиясы, 410-шы атқыштар полкі автоматшылар взводының командирі Камалдиновқа Ленин, Қызыл Ту, I дәрежелі Отан соғысы, Қызыл Жұлдыз ордендері және медальдары берілді. 1943 жылы Орлов облысының Малоархангельск қаласын қорғады. КСРО Жоғарғы Кеңесі Президиумының Жарлығымен 1943 жылы 27 тамызда Кеңес Одағының Батыры атағы берілді. 1980 жылы аға лейтенант Камалдинов Теміртау қаласында тұрды.

ИВАНИШКО ФЕДОР ЯКОВЛЕВИЧ

(1910)

Иванишко Федор Яковлевич 1910 жылы туған. Әскерге дейін Жезқазған қаласында жұмыс істеген. Федор Яковлевич 1943 жылы Армия қатарына алынды, өзін ержүрек пулеметші ретінде көрсете білді. 1943 жылы 31 желтоқсанда ІІІ дәрежелі Даңқ орденімен, 1944 жылы 2 наурызда II дәрежелі Даңқ орденімен марапатталды. Гвардиялық 67-ші атқыштар дивизиясының жеке гвардиялық атқыштар батальоны пулемет расчетының командирі, гвардия старшинасы Федор Иванишко, әсіресе 1944 жылы жазда Белоруссия жерінде болған ұрыстарда ерекше көзге түсті. Батырдың расчеты 1944 жылы 24 маусым мен 3 шілде аралығында жаудың 50 солдаты мен офицерін өлтіріп, 2 қол зеңбірегін және 15 мылтықты қоса, 2 фашисті тұтқынға алды.