Қарағанды ОӘҒК

Белгілі журналист-публицист, медиа зерттеуші, ҚР Президентінің БАҚ саласындағы сыйлығының лауреаты Төлен Тілеубайдың «Түлкілітаудың аспаны» атты жаңа кітабының тұсаукесері өтті.

Бұл шараға ақын-жазушылар, мәдениет және қоғам қайраткерлері, журналистер, ғалымдар, өлкетанушылар, ұстаздар, кітапханашылар, студенттер мен мектеп оқушылары қатысты.

Таныстырылым кеші барысында сөз алған мәртебелі қонақтар кітап авторының еңбегін жоғары бағалап, жаңа шығармасының оқырманға жол тартуымен құттықтады. Олардың қатарында: өлкетанушы Тұңғышбай Мұқан, , аудармашы, зейнеткер Рымбала Смайылова, журналистер Әли Тойжігіт, Әдебиет Белгібайұлы, «Жастар әлемі» журналының редакторы Гүлнара Шоменова т.б. бар. Таныстырылымды журналист, «Егемен Қазақстан» газетінің Қарағанды облысы бойынша тілшісі Қасымхан Ғалым жүргізді.

Кеш барысында Төлен Тілеубай өзінің шығармашылық жолы, жаңа кітабының мазмұны туралы кеңінен әңгімелеп, оқырмандармен ой бөлісті. Автор сондай-ақ балалар әдебиетіне бет бұру бағытындағы жоспарларын айтып, бұл саладағы өзекті мәселелерге тоқталды.

«Түлкілітаудың аспаны» кітабына қатысты Қазақстанның еңбек сіңірген ұстазы Сәбира Құлпейісова, Қарағанды облысының тілдерді дамыту жөніндегі басқармасы Ресурстық тіл орталығының бөлім меңгерушісі Жұпар Жақан, филолог ғалымдар Әлімжан Құтжанұлы, Жанар Рамазанова, Е.А. Бөкетов атындағы ҚарУ студенттері және А. Байтұрсынұлы атындағы гимназияның, «Білім-Инновация» лицей-интернатының, «ДАРЫН» мамандандырылған мектеп-лицей-интернатының, №19 жайлы мектебінің оқушылары өз пікірлерін білдірді. Олар кітаптың мазмұны, автордың жазу стилі және шығарманың идеялық мәні туралы ойларын ортаға салды.

Ашық диалог алаңында басқада қатысушылар Төлен Тілеубайдың шығармашылығы жайында өз бағаларын берді.

Кездесу аясында оқырмандар назарына «Төленнің жүрек лүпілі» атты кітап көрмесі ұсынылды. Сондай-ақ, автордың «Түлкілітаудың аспаны» кітабына арналған оқырмандардың жүрекжарды пікірлерінен құралған арнайы жинақ таратылды. Бұл шара оқырман қауымға қаламгер шығармашылығын тереңірек танып, жаңа қырынан бағалауға мүмкіндік берді.

Шара соңында автор қатысушылардың сұранысы бойынша кітаптарына қолтаңба қойып, естелікке суретке түсті. Бұл сәт көпшілік үшін ұмытылмас әсер қалдырды.

Кітапхана ұжымы мен оқырмандар қауымы қаламгердің шығармашылығына сәттілік тілеп, алдағы уақытта да осындай әдеби кештер жалғасатынына сенім білдірді.

Өлкетану әдебиеттері бөлімінің басшысы С.О. Телпекбаева