Қарағанды ОӘҒК

Ғұлама ғалым: қазақ халқының біртуар перзенті, көрнекті ғалым, Қазақстан Ғылым академиясының тұңғыш президенті Қаныш Имантайұлы Сәтбаевтың 125 жылдығына арналған библиографиялық жадынама / Н.В. Гоголь атындағы Қарағанды облыстық әмбебап ғылыми кітапханасы ; құраст. Г.С. Мухамбетчина. – Қарағанды, 2024. – 24 б.

Қазақ халқының бір туар перзенті Қаныш Имантайұлы Сәтбаев ғұлама ғалым ғана емес, бүкіл дүние жүзіне танылған оқымысты, әрі ірі қоғам және мемлекет қайраткері болған ұлтымыздың мақтанышына биыл 125 жыл.

Қазақ даласының осындай алыпты дүниеге әкелуі, ғалымның соңында қаншама игі істердің қалуы жайдан-жай емес. Иә, Қазақстандағы тұңғыш геология ғылымдары институтын ашуы, Ұлттық Ғылым академиясының құрылуы, Қазақстан ғылымын сол кезде шоқтығы биік деңгейге көтеруі - Қазақ елінің мәнгі өшпес мұрасы.

ЮНЕСКО-ның шешімімен 1999 жыл – қазақ халқының ұлы перзенті Қаныш Имантайұлы Сәтбаев жылы деп жарияланды. Ендеше бұл - Қанекеңнің мәңгі өлмес есімі мен ешқашан өшпес ғұлама ғалымдығы барша әлем көгінде жарық жұлдыздай жарқырап, егеменді еліне нұрын шашада береді .

Библиографиялық жадынамаға ғалымның өмірбаяны және ол туралы жазылған әдебиеттер мен мақалалар тізімі енгізілді.

Библиографиялық жадынама студенттерге, зерттеушілерге, өлкетанушыларға, әдебиетті сүйетін көпшілік оқырманға арналған.

Өшпес өнеге иесі: Ұлы Отан соғысының ардагері. жазушы, журналист. Қазақ әдебиетінде шырғалаң оқиғалы детектив жанрының негізін салушы Кемел Тоқаевтың 100 жылдығына арналған библиографиялық жадынама / Н.В.Гоголь атындағы Қарағанды облыстық әмбебап ғылыми кітапханасы ; құраст. Г.С.Мухамбетчина. – Қарағанды, 2023. –11 б.

Классик, детектив жанрының дарабозы Кемел Тоқаевтың өмір тарихы өте қызық. Басынан небір қиын-қыстау заман өткен, қабырғасы қатпаған қаршадай кезінде ата-анадан айырылып, тұл жетім боп қалған кездері бірнеше кітабына арқау болды.

Дарабоз жазушымен қызметтес болған, Әбілфайыз Ыдырысовтың жазушы жайындағы бір әңгімесі қазақ радиосының «Алтын қорында» сақталыпты. Әбілфайыз Ыдырысов: «Кемел Тоқаев парасатты, жаны сұлу адам еді. Үлкенге де, кішіге де ілтипатпен қарайтынды. Кемшілікке төзбейтін, адамның қателігін бүкпесіз бетіне айтады. Менмендік, тәкаппар қылықтан ада, қандай игі істер атқарса да, ешкімге міндет артпай, заманына сай адал еңбек ететін-ді. Бізге Бас редактор болып келген соң тез тіл табысып кетті. Ол өзі білмейтінді сұрап алушы еді. Сондай ақылды адам еді».

Кемел Тоқаевтың өнегелі өмір жолы, еңбекқорлығы мен адами қасиеттері жас ұрпаққа үлгі болуға лайық. Ал оның туындылары әдебиет тарихындағы асыл қазына, өшпес мұра болмақ.

Жадынамада ақынның өмірбаяны, шығармашылығы, қазақ тілдеріндегі шығармалары, ол туралы кітаптар, мақалалар тізімі берілген. Бұл жадынама Н.В.Гоголь атындағы облыстық әмбебап ғылыми кітапхана қорындағы материалдары бойынша жасалған.

Көпшілік оқырман қауымға арналған.

Ұлттық рухтың шырақшысы: Қазақ әдебиеті газетінің 90 жылдығына арналған библиографиялық жадынама / Н. В. Гоголь атындағы Қарағанды облыстық әмбебап ғылыми кітапханасы ; құраст. Г.С.Мухамбетчина. – Қарағанды, 2024. - 15 б.

Бүгінде 90 жылдық мерейтойын атап өтіп отырған «Қазақ әдебиеті» газетінің алғаш құрылғандағы мақсаты қазақ әдебиетін насихаттау, әдебиетті жұртшылыққа таныту болды.

«Қазақ әдебиеті» – ана дәуірде де, бүгінгі Тәуелсіздік дәуірінде де қазақ көркем сөзінің өсуі мен өркендеуіне барынша ықпал жасаушы, Республикадағы бірден – бір қарымы мықты басылым.  

«Қазақ әдебиеті» газетінің ұзақ жылдардағы тарихына өрлегенде, бізге мәлім шежіресінде оның жұртшылық ықыласына бөленгені, елдің көңіліндегі армандар мен мүдделерді дәл тауып айтқан, проблемалық мақалалар көтере білген басылым екендігіне көз жеткіземіз. Сонымен қатар газетің әр санынан қоғамдық өмір, саясат, әдебиет пен өнер,  ұлттық салт - дәстүр тақырыбын оқи аламыз. Газетті оқи отырып оның бүгінгі таңда үлкен жетістікке жеткенін көреміз.

«Қазақ әдебиеті» газетінің тойы – жалпы, қазақ әдебиетінің, қазақ мәдениетінің, ұлт руханиятының тойы, ел - жұртымыздың еңселі биігі.

Құрметті оқырман «Ұлттық рухтың шырақшысы» атты библиографиялық жадынаманы назарларыңызға ұсынамыз.

Жадынама көпшілік оқырмандарға арналаған.

Қазақстан Республикасының 2024 жылы аталып өтілетін және еске алатын күндер күнтізбесі / Н. В. Гоголь атындағы Қарағанды облыстық әмбебап ғылыми кітапханасы ; құраст. Г.С. Мухамбетчина. – Қарағанды, 2023. – 45 б.

Жыл сайын Н.В. Гоголь атындағы Қарағанды облыстық әмбебап ғылыми кітапханасының ақпараттық - библиографиялық қамтамасыз ету бөлімі Қазақстан Республикасының ұмытылмас, тарихи күндеріне арналған қазақ және орыс тілдерінде күнтізбе шығарады.

Күнтізбеде елімізге танымал ақын-жазушылардың, мәдениет және өнер қайраткерлерінің, ғалымдардың, саясаткерлердің, қоғам және мемлекет қайраткерлерінің 2024 жылы атап өтілетін мерейтойлы даталары қамтылған.

Сонымен қатар, басылымға тарихи оқиғалардың күндері мен Қазақстан Республикасының ұлттық, мемлекеттік және кәсіби мерекелері күндері енгізілген. Мерейтойлы даталарды атап өтуде өзіндік көмегін тигізеді деген мақсатта Н. В. Гоголь атындағы ОӘҒК қорынан табылатын әдебиеттер тізімі ұсынылған.

Күні мен айы белгісіз айтулы даталар бөлек беріліп, оларға да әдебиеттер тізімі жасалған.

Күнтізбе материалы әр айға бөлініп, онда жалпы тізім бойынша орналастырылған.

Басылым көпшілік қауымға, мамандарға, студенттер мен оқушыларға, мектеп мұғалімдеріне, кітапханашыларға арналған.