Қарағанды ОӘҒК

Барлық дәуір мен барлық халыққа тән әлемдік өнердің өткені де, бүгінгісі де және болашағы да әрдайым ірі тұлғалардың шығармашылық жаңалықтарымен, олардың адами рухының биік деңгейімен байланысты. Осындай даңқты өнер адамдарының қатарында Телжанов Қанафия Темір-Болатұлы да бар.

Ол – Қазақстанның көркемсурет өнерінің қалыптасуы мен дамуына орасан зор үлес қосқан отандық мәдениеттің көрнекті өкілі. Оның республикаға және отандық көркемсурет өнерінің, ғылым және білім саласының дамуына, жоғары білікті кадрларды дайындауға, мемлекеттік, қоғамдық қызметке сіңірген зор еңбектері жалпы қоғамдық және халықаралық тұрғыда жоғары бағалауға ие болды.

Дархан жерімізді асқан шабытпен, шырқау сезіммен бейнелеген суретшінің шығармалары, Отанға деген зор махаббатқа, адамдарға деген ыстық сүйіспеншілікке толы картиналары көрермен замандастарының кеудесіне ерекше мақтаныш сезімін ұялатады.

Суретші өмір жолында талай тар жол, тайғақ кешулерді бастан өткерді, сырт көзге сәтті де жеңісті көрінгенмен, қасірет пен шерге толы қатал ХХ ғасыр оның тағдырында да өз ізін қалдырған.

Қанафия Телжанов жасаған "Кеңес" картинасында өте оңай әуен эпикалық тұрғыда көрсетілген. Суретші таудан көрген: биік-биік шоқыдан төменгі жақтың бәрі көрінеді, артында мұзды шыңдар, асыққан бірнеше салт аттылар шөптің үстіне жайғаса бастады. Құдды баяулатып, биік таудың басындағы ақ қарлы шыңдарымен түйісіп, аспанда бұлттар жүзетін сияқты. Таудың етегін жұмсақ кілемдей жапқан көк-жасыл жас шөп күн астында күйіп жатқандай, шағылысады. Сонымен қатар, қоршаған ұлы табиғаттың баурайында өздерін нық әрі сенімді сезінген адамдардың әңгімесі де баяу және бірқалыпты сарында. Картина адам мен ортаның үйлесімін сездіре отырып, баяндау сюжетінсіз-ақ осы көңіл-күйдің бірлігінде бір-бірін түсінудің ұлттық сипатының маңыздылығынан көрінеді.