Қарағанды жоғары политехникалық колледжінде «Әділ қоғам» жобасының аясында «Ой-Орда» пікірлесу клубының мазмұнды отырысы өтті. Басқосу Қаздауысты Қазыбек би мұрасына арналды.
Шара барысында қазақ руханиятына зор үлес қосқан ғалым, филология ғылымдарының докторы, профессор, шежіреші, фольклорист Мұхаммедқали Әбдуов мағыналы дәріс оқып, Қазыбек бидің өмір жолы, мәмілегерлігі мен әділдік ұстанымдары жөнінде тың деректермен бөлісті.
Ғалым жастарға Қазыбек бидің небәрі 15 жасында елшілікке барып, қазақтың намысын сөзбен қорғаған тарихи сәтін әсерлі түрде баяндап, оның тектілік пен бірлікті ұлықтаған тұлға екенін нақты деректермен жеткізді.
Мұхамедқали Ілиясұлының дәрісі студенттер үшін тек тарихи сабақ емес, өмірлік ақыл болды. Сонымен қатар ол ұлттық тағам мәдениеті мен дұрыс ауқаттану жөнінде құнды кеңестер берді.
Отырыстың келесі бөлігі - «Тарихи кейіпкермен интервью» форматында болды. Мұнда студенттер Қазыбек би бейнесін сомдап, шешендік дәстүрді берілген тапсырмалар негізінде тарихи дау-дамайларды шешу арқылы әділдік пен парасаттылық қағидаттарын тәжірибе жүзінде меңгерді.
Кітапхана қызметкерлері Қазыбек би туралы рухани тағылымы мол еңбектерге әдеби шолу ұсынып, қатысушыларды құнды басылымдармен таныстырды.
Шарада «Көлік технология» бөлімінің меңгерушісі Сүлейменова Жазгүл Ахметқызы, Әлеуметтік-экономикалық пәндер кафедрасының меңгерушісі Айтман Елдос Ерғазыұлы және қазақ тілі мен әдебиеті пәнінің мұғалімі Таласбаева Нүргүл Ермекқызы сөз сөйлеп, жастардың тарихи танымына бағыт берген іс-шараның өзектілігі мен тәрбиелік маңызын атап өтті. Олар студенттерді тарихи мұраны құрметтеуге, әділдік пен парасаттылықты өмірлік қағида етуге шақырды.
Мұхаммедқали Ілиясұлы өзінің «Шешеннің сөзі ортақ», «Қаракесек Қараменде би», «Ақтентек сал» кітаптарын кітапхана қорына сыйға тартты.
Тағылымды кездесу естелік суретке түсумен аяқталды. «Ой-Орда» пікірлесу клубының келесі маусымы 2026 жылдың қаңтарында басталады.
Клуб мүшелігіне қабылдау — ашық. Жастарды белсенді қатысуға шақырамыз.
