Кітап – адамзат баласының баға жетпес құндылығы. Білімнің биік белестеріне жетелейтін де осы – кітап.  Жақсы кітаптың бар қазынасын оқырман жүрегіне жеткізу – кітапханашы міндеті. Осыған орай, Қарағанды облыстық Н.В.Гоголь атындағы әмбебап ғылыми кітапханасында 2018 жылдың 27 ақпан күні "Алты ауызға сыйғыздым, екі дүние бағасын..." деген атпен "Аманат" кітабының тұсауы кесілді.

Аталмыш кітап 2017 жылдың соңында Қарағандыдағы "Тенгри" баспасынан жарық көрді. Бұл жинақта Қарағанды аймағында туған, есімі бүгінгі ортаға кеңінен таныс емес тұлғалардың естелік жазбалары топтастырылған. Кітапта Қажыбай Мәндібайұлы, Қалижан (Мұхаммедқали) Жандығұлұлы, Қоқым (Біләл) Алшымбекұлы, Нұржан Шоңұлы, Дүйсенбай Маңайұлы сынды діндарлар мен ақындардың естелік жазбалары мен өлең-жырлары жарияланып отыр.

2018 жылы 2 наурыз күні Қарағанды облыстық Н.В. Гоголь атындағы әмбебап ғылыми кітапханасында Қазақстан Жазушылар Одағының мүшесі, ақын  Бағдат Мүбәрактың "Ай көрдім, Шолпан көрдім, Айман көрдім..." атты шығармашылық кештің аясында "Алтынкүрек" кітабының тұсаукесер рәсімі өтті.

Шығармашылық кешіне қазақ әдебиетінде өзіндік орыны бар, сүбелі сөздің иелері ақын С. Ақсұңқарұлы, С. Сағынтай, Қ. Асқар, Т. Әділов,  ғалымдар Т. Көкетаев, Қ. Асанов, Ж. Жарылғапов және жас ақындар қатысты. Сонымен бірге осы шараға арнайы Астана қаласынан келген кеш иесінің үзеңгілес достары Р. Әбдірахман, "Астана ақшамы" газетінің журналисі А. Қалжанов  кештің сыйлы қонағы болды.Сөз кезегін алған қонақтар қазақ поэзиясына өзіндік қолтаңбасымен келген ақын жырларының ерекшеліктері мен өзіндік өзгеше бітім-болмысын әсерлі баяндады.

Қарағанды облыстық мәдениет, архив және құжаттама басқармасы басшысының орынбасары Е.М. Нілдібаев құттықтау сөз сөйледі.

Азамат ісімен, әрекетімен көрікті дейміз. Демек, біреу туралы сөз бастағанда ең әуелі ол не бітірді деген сұрақты қою заңдылық. Белгілі бір саланы ғана меңгеріп, сол арқылы ел мақтанышына айналып, халық құрметіне бөленіп жүрген тұлғалар аз емес. Осындай азаматтың бірегейі – Марал Хасен. Ол еліне, жеріне еңбегі сіңген, ойы терең, тілі бай журналист, публицист, әзіл-сықақтың майталманы, өзінің тілін құрметтеп, өзгенің тілін шебер меңгеріп, қазақтың көркем сөзін басқаларға таныта білген аудармашы, есімі көпшілік оқырман қауымға кеңінен танымал. Өткір ойлы, биік парасат-пайымды, терең зейін-зерделі, шын жүректен туындаған еңбектері халықтың қарапайым, ұғынықты тілімен жазылғандықтан әркез оқырман жүрегіне жол тапқан.

Бұл кештің басты жаңалығы – автордың "Нобель сыйлығының лауреаттары: Светлана Алексиевич, Элис Манро 2 кітап" атты туындының таныстырылымы. М.Хасеннің жары Рымбала Смайылова жазғандары мен аударған дүниелерін тірнектеп жинап, теріп, баспаға тапсырып, өз қаражатына жарыққа шығарып, орасан еңбек етіп, оқырман қауымды жағымды жаңалықпен қуантты.

Кештің басты қонағы болған Р. Смайылова Светлана Алексиевичтің "Соғыстың сұрқы әйелге жат", "Мырышқа айналған қыршындар" деректі хикаяттың аудармасы қалай жазылғандығы туралы әңгімелеп берді. Көзі тірісінде шығара алмай кеткен М.Хасеннің жаңа кітабының лентасын замандас қаламдастары қиды. Өмірге келген жаңа кітаптың оқырманы көп болғай деген тілектер айтылды. 

Мемлекет басшысының «Болашаққа бағдар: рухани жаңғыру» атты бағдарламалық мақаласында көтерілген көкейтесті мәселенің бірі – латын әліпбиіне көшу. Осыған орай кітапхана қабырғасында  мағыналы бірнеше іс-шаралар атқарылып жатыр. Яғни, жаңа әліпбимен танысу жалғасуда. 2018 жылы 18 қазан күні «Таныс бол және пайдалан» тақырыбында мазмұнды іс шара өтті.

Латын әліпбиіне көшудің маңыздылығын ашу мақсатында өткен шараға  Қарағанды облысының тілдерді дамыту жөніндегі басқармасы жанындағы «Ресурстық тіл орталығы» Латын графикасына көшу бойынша оқыту және әдістемелік жұмыс бөлімінің меңгерушісі Ж.Р. Жақанова, Латын графикасына көшу бойынша оқыту және әдістемелік жұмыс бөлімінің әдіскері Ә.Д.Смыкова,  Қарағанды облыстық тарихи – өлкетану музейінің кіші ғылыми қызметкері Д.А.Сәкімбай қатысты.

Барлық қатысушылар белсенді қатыса отырып, көкейдегі сұрақтарына жауап алды.